KHAWTHLIR

Library hawng
Goodwill Foundation, Turnstone Global leh Amway India-te bultuma mitdelte tana Special Blind School, Durtlanga Free Audio Digital leh Braille Library chu nimin khan Art & Culture minister R Romawia'n a hawng. Braille Library hi Amway leh Turnstone ṭang dunin India khawchhak lama an din panga zinga mi a ni a; lehkhabu pangngai chhiar ve thei lo mitdelte tana ṭangkai tur chanchinbu, compact disc leh lehkhabu ṭhahnem tak a awm a ni.

Zirlaite lawmpui
MZP headquarters, Zawlnuam chuan nimin khan Zawlnuam Vengpui Hall-ah kumina an khuaa zirlai hlawhtlingte lawmpuina hun an buatsaih a, Mizoram State Commission for Women chairperson Vanlalawmpuii Chawngthu, MLA-in a hmanpui. MLA chuan, "Tih tak zet leh taima taka lehkha zirte hi an hlawhtling ṭhin a ni," tiin, zirlaite chu Mizoram leh hnam tan an thiamnate hmang ngei turin a chah.

MST bus
Transport department chuan June 1, Ningani aṭangin Aizawl leh Siaha inkarah khualzin phur bus a tlantir dawn a, chawlhkar khatah ṭum hnih a tlan dawn.

Guwahati-a thite Vui an ni
Guwahati-a mi kut tuara thi C Lalhmangaihsanga (26) leh R Lalmalsawma (26), Lunglei Electric Veng ve vete chu nimin khan kohhranin an inah an vui a; chumi hnuah Electric Veng YMA Hall-ah YMA Sub-Hqrs. Lunglei bultumin sûnna hun hman a ni bawk.

Electric chhia
Nimin chawhma lam khan Serchhip-Bukpui aṭanga Lungleia kawlphetha pekna hruipui, 132 KV line a chhia a, hei vang hian Serchhip aṭanga chhim lam zawng, Lunglei, Lawngtlai leh Siaha district-ah kawlphetha pek theih a ni lo. Power & Electricity department chuan power line chhia hi siam ṭhat tumin an buaipui mek a ni.