MHMSA-te lungawi loin an châwl mek

Mizoram Health Multipur­pose Service Association (MHMSA) chuan, an thil phût tihlawhtling tura sorkar nawra May 29 aṭanga mass casual leave an lak chu niminah an chhunzawm. MHMSA chuan, an thil phûtah hian Health Minister duh dan ang ni loin, Health Secretariat-in ṭha an tih angin an kalpui lui tlat niin an sawi.

MHMSA thuchhuah chuan, "Kan Recruitment Rules (RR) tura kan dil/ngen ṭhin chu Health Secretariat-in ṭha nia a hriat angin a kalpui lui tlat a. Kan Health minister Pu Lal Thanzara pawhin kan ngennate âwm min tihpui a, thu mai ni lo, ziak ngeiin Health Secretary hnenah min ziahsak ṭhin. Thil thar ni loin, tuna Health department-a kan technical pui zawng zawng pawhin an hma lai ni vek chu kan dil mai a ni a, sorkar tan insenso belhna tur a awm lo," a ti.

May 29, 2017-a sorkar thu­chhuahin, promotion atana LDE hman chu inelna thianghlim a awm theih nana buatsaih a nih thu a tarlan chungchangah MHMSA chuan, "Thawktute tan chuan lungchhiatna leh lungawi lo chunga hna thawka min siamna leh hnathawkte inrahbehna niin kan ngai lo thei lo," an ti a; Health department chhunga service dangte LDE hmang tura tihsak si lo a, multipurpose worker-te hmang tura an ti bik chu in­thliar hranna a nih thu sawiin, hriat­thiam har an tih thu an tarlang.

MHMSA chuan, kum 2011 aṭanga RR hman a nih hnuah tun thlengin LDE chu boycott a ni a, LDE hmanga promotion hmu an la awm lo tih sawiin, chu chuan an RR hman mek chu a hmantlak lohzia a tilang chiang tih an sawi a; an phût angin RR siamṭha a, promotion atan 100% seniority dah turin sorkar an ngen nawn leh a ni.

MHMSA tarlan danin, tuna health worker (H/W) kum 1981 leh a hnu lama lutte chu promotion la hmu lo chin an ni a, kum 36 thawk tawhte pawh promotion la hmu lo an ni. Zir chhuah inang vek an nih avangin mithiam bik an awm lo a, chuvang chuan LDE promotion chu hman a ṭul loah an ngai a ni.

MHMSA-ah hian health worker, health supervisor leh community health officer-te an awm a; tun kar chhung mass casual leave lan an tum a, an thil phûtah thu lawmawm an hmuh loh chuan June 5 aṭangin tiam chin awm loa chawlh an tum. Chawlhkar khat chhung ve ve badge dum bel leh pen down strike-in lungawi lohna an lantir tawh bawk.