Excise Superintendent hrem an phût

All Mizoram Pe­troleum Dealers Asso­ciation (AMPEDA) chuan thuchhuah siamin, Lungleia Excise & Nar­co­tics superintendent Lalhmingthanga leh Lalthianghlima ten zu rûi chunga Jedaz Filling Station, Lunglei-a thawktute kut an thlak chu an dem thu an tarlang a; an chungah dan anga hremna lek turin sorkar an phût.

AMPEDA tarlan danin, Excise & Nar­cotics superintendent Lalhmingthanga leh Lalthianghlima te hian May 25, 2017 zan dar 9 velah Jedaz canteen-ah zu rûi chungin chaw ei an tum a, chaw ei tur mumal a awm tawh loh vanga an thinrimin canteen bungruate an tichhia a ni. Thil awmzia ngaihvena kal Jedaz pump-a chowkidar chu kut an thlak a, an awmnaa a tlanchhe tawh pawh khawih zui tumin an ûm zui a ni.

AMPEDA chuan, "V/C leh YMA hruaitute an thlen hnu pawha ṭawngkam uchuak taka an pawi pawh sawi lo chunga an la tawng zel hi kan hrethiam lo hle," tiin, zu rûite mantu tura ngaihte'n zu rûi chunga buaina an siam zawk chu vanduaithlak an tih thu an tarlang a; "Jedaz Filling Station neitute'n FIR an thehluh pawh tun thlenga hmalakna a la awm lo pawh hi hriatthiam har kan ti hle a ni," an ti.

AMPEDA hian Lal­hmingthanga leh Lal­thianghlima-te chungah dan anga hremna lekkawh ngei an phût thu tarlangin, "Sorkarin action a la lo a nih chuan AMPEDA chuan a ṭul angin kan lungawi lohnate kan lantir ve lo ang tih kan sawi thei lo," an ti a ni.