Webinar-ah K Lalrinliana a tel

Associated Chambers of Commerce and Industry of India (ASSOCHAM) buatsaihin nimin khan India ram pum huap webminar neih a ni a, Union minister of state for Fisheries Pratap Chandra Sarangi khuallian niin, Mizoram Fishe­ries minister K Lalrinliana pawh a tel.

K Lalrinliana chuan, Covid-19 vangin Mizorama sangha khawitute'n harsatna an tâwk tih sawiin, "Sangha no khawi tur leh a chaw lak luh kawng­ah harsatna an tâwk nasa. Sangha dîl enkawl ṭhat theih loh a tam a, sangha thar a tlem phah a rinawm. Sorkar laipuiin PMMSSY scheme thar a siam behchhanin sangha khawia eizawnna leh a hralhna kawngah Mizoramin ngai a awh chho a, a hma aia lian zawk leh mumal zawka hmasawnna hmuh ka beisei," a ti.

Mizorama sangha chaw siamna atana pawimawh bàwl hlo awm dan zir chian a pawimawh thu leh zirbingna kalpui a ṭul thu sawiin Fisheries Minister chuan, "Sangha chaw siamna bàwl hlote hmun dang aṭanga lak ringawt chuan Mizoram tan sangha chawah intodelh a har dawn," a ti a, sangha no thar chhuah lamah hmalak a ṭul thu a sawi.

K Lalrinliana chuan, sorkar laipui aṭanga sum hmuh tlai leh instalment a hun takah a thlen ṭhin loh avangin state sorkar-in scheme leh programme kalpuinaah harsatna an tawh ṭhin thu a sawi a; PMMSSY chu a kalhmang siam ṭha turin Union Minister a ngen bawk.