ZPM-in Aizawl Smart City project hnuaia CCTV siamtu tur zawnna tih ṭhat an phût
Zoram Peoples' Movement (ZPM) party chuan thuchhuah siamin, Aizawl Smart City project hnuaia CCTV siam hna thawktu tur zawnna chu tih ṭhat leh ngei an phût thu an tarlang.
ZPM hian July thla tìr lam khan thuchhuah an siamah, Aizawl Smart City project hnuaia cheng vbc. 101 sènna tur Aizawl khawpuia CCTV vuahna tur hna thawk turin Bharat Electronic Ltd (BEL) thlan a nih thu te, BEL chuan an hna chu cheng vbc. 60-a zuar chhawngin hna thawktu tur tender chhuaha an zawn thu te, BEL chuan cheng vbc. 41 hlêp an tum thute an lo tarlang tawh a ni.
ZPM press release chu BEL chuan July 6, 2020-ah chhángin hna chungchang an sawifiah tih sawiin ZPM chuan, "ZPM chu thil hre chiang loa thuchhuah siamah an rawn puh a. Amaherawhchu, an hna hmuh cheng vbc. 101 aṭanga vbc. 41 hlépa vbc. 60 chauha thawh tura tender an chhuah chungchang sawifiahna mumal an nei lo. ZPM chuan thil a hre chiang thawkhat hle a ni tih sawi a ṭul ta a ni," an ti.
ZPM party chuan, "BEL-in India ram hmun hrang hranga hna an thawhnaa thawh ṭhat tâwk loh leh chu’ng an hnathawhnaa corruption vanga CBI case an neihte leh IAF hnuaia an hna hmuh vanga Vigilance an inrawlhnate pawh kan hria a ni," an ti a; BEL-in hmun danga hna an thawh ṭhat lohte an hre chiang thawkhat niin an sawi.
An tarlan danin, India ram hmun danga BEL-in hna an thawh tawhnaah CBI hnuaia anti-corruption hoin an chhui zui te, an chhui chhan zingah inphiarrûkna te, inbumna te, sum hman dan inmil thei lote leh Prevention of Corruption Act hnuaia thubuai awmte hmuh tur a awm a ni.
ZPM chuan, BEL-in hmun danga hna an thawh ṭhat lohte leh a kaihnnawiha buainate tarlan vek ṭul an ti lo tih an sawi rualin, hmun danga sûlhnu pawr an hnutchhiah nual tawh avang leh Smart City project hnuaia Aizawla CCTV bunna tur cheng vbc. 101 aṭangin cheng vbc. 41 hlêp an tuma a lan avangin an thawh ṭhat loh a hlauhthawnawm thu an sawi a, "Aizawl Smart City project hnuaia CCTV vuahna tura hna thawktu tur hi ennawnin, open tender-in thawktu tur zawng ṭha leh turin Mizoram sorkar kan phût a ni," an ti.