MSHCS hnuaiah damlo bill táng Cheng vbc. 72.15 a la awm mek

Mizoram State Health Care Scheme (MSHCS) hnuaiah damlote inenkawlna senso bill la pek loh cheng vbc. 72.15 a awm mek a, chu'ngte chu mi 26,673-te bill a ni.

Right to Information (RTI) Act hmanga zawhna Directorate of Health Services SPIO-in a chhan danin, MSHCS hnuaiah hian April 1, 2022 - March 31, 2023 atan chhungkaw 39,505 an inziak lut a; chutih laiin, kum 2021-22 chhunga damlo bill thehluh tawh pek chhuah a la awm lo.

Damlo bill batsak chu mi 26,763 an ni a, chu'ng zinga mi 2,812 chu Covid-19 avanga damlo niin, mi dang 23,861 chu natna dang vanga damlo an ni. Covid-19 vanga damlo mi 2,948-te'n bill an thehlut tawh a, chung zinga mi 136 chu pawisa pek an ni tawh.

MSHCS-in bill a dawn tawh, pawisa a la pek chhuah loh zawng zawng chu Rs 72,15,47,595 a ni a; chu'ng zinga Rs 4,14,65,662 chu Covid-19 vanga damlote inen­kawlna bill niin, Rs 68,00,81,933 chu natna dang vanga damlo inenkawlte bill a ni.

Kum 2022-23 atana Mizoram sorkar aṭanga MSHCS-in sum a hmuh tawh zat zawhna chhangin SPIO chuan, "Mizoram sorkar aṭangin kum 2022-23 hian cheng vbc. 4 (ADB loan corpus aṭanga FMU 1st quarter 2022-23) hmuh tawh a ni," a ti a; sum hmuh tur zat bithliah a awm loh thu a tarlang bawk.