CIC-in RTI Helpline a tlangzarh

Chief information commissioner (CIC) Lalnunmawia Chuaungo chuan nimin khan Administrative Training Institute (ATI) Auditorium-ah RTI Helpline a tlangzarh. CIC chuan, state information public officer (SPIO)-te chu RTI hmanga dilna an dawnte phurritah ngai lo a, sorkar langtlang siamna tur a ni tih hriaa theihtawp chhuah turin a chah.

RTI Helpline hi ATI buatsaih a ni a, RTI Act & Rules hman chungchanga harsatna thlenna tur a ni. Pisa hun chhungin phone number (toll free) 1800-8893-218 leh whatsapp no. 9863346173 bakah, Facebook/ Instagram/Twitter-a RTI Helpline, Mizoramahte engtik lai pawhin harsatna thlen theih a ni.

CIC Lalnunmawia Chuaungo chuan, RTI Act kaltlanga information pek chhuahah state dangte aiin Mizoramah harsatna a tlem thu sawiin, "State ṭhenkhatah chuan RTI Act chhanna pending 3,000 chuangte a awm ṭhin. Thla kua kal taa Mizoram Information Commission ka zawm hnuah hetiang case hi pali/panga vel bak a la awm lo a, a lawmawm tak zet," a ti. RTI Act hmanga zawhna chhangtu SPIO-te chu zawhna an dawnte phurrita ngai lo a, sorkar langtlang siamna tur leh an hnathawhte puan­zarna remchang a ni tih hriaa theihtawp chhuah turin a chah a ni.

Online-a RTI Act hmanga dilnaah sorkar department ṭhenkhat an la inziah luh loh thu sawiin Lalnunmawia chuan, "Mizoram Chief Secretary hnenah lehkha ka thehlut tawh a, department zawng zawngte an inziah luh vek theih nan theihtawp kan chhuah mek," a ti.

RTI Act nodal officer K Lalkroschhuanga tarlan danin, Ministry of Personnel, Public Grie­vances and Pensions project pakhat, Impro­ving Transparency and Accountability in Government through effective implementation of RTI Act hnuaiah cheng nuai 30.48 dawn a ni a, chumi hmang chuan helpline siam niin, helpline viltu tur thawktute pawh lak a ni tawh. Media work­shop, district hrang hranga training neih, online certificate course, SPIO leh AAP tana training-te la buatsaih an tum bawk.

RTI Helpline tlang­zarhnaah hian RTI Act chungchang lemchan inziahsiak result puan a ni a; pakhatna C Lallianngura, MINECO-in Rs 10,000, pahnihna H Hmingthankhuma, Bethlehem Vengthlangin Rs 7,000, pathumna Grace Lalrinpari Hauzel, Khatlain Rs 5,000 an dawng a ni.