Theitui ang vela grape siam dan tur Sorkarin a ngaihtuah - K Lalrinliana

YMA Sub-Head­quarters, Kolasib hnuaia Kumpuan Committee-te'n ruihhlo an man khawm cheng nuai 3.30 vel hû chu nimin khan tihral a ni. Ruihhlo tihral puala inkhawmah Kolasib bialtu MLA K Lalrinliana, minister of state chuan grape chu theitui ang vela siam dan a awm em tih sorkarin a ngaihtuah mek thu a sawi.

K Lalrinliana chuan, grape wine avanga harsatna awm mek chungchang sawi­in, "Mi tam takin kut hnathawktute thar chhuah a nih avanga hrethiam turin sorkar an beisei. Champhai district-ah phei chuan grape hi an thar nasa a, a tihral dan turah an buai hle. Grape aṭanga siam wine-te chu alcohol tihtlem a, theitui ang vela siam dan a awm lo'm ni tihte sorkarin a ngaihtuah mek a ni," a ti.

Ruihhlo awm lo tura do a ngaih thu sawiin Lal­rinliana chuan, "Kei­ni state rethei, thawh chhuah nei tlem em em hi chuan ruihhlo do hi kan tihmâkmawh a ni. Ruihhloin chhungkua tam takah harsatna a thlen tawh a, a thlen mek zel. India ram pawh a buai phah," a ti bawk.

Kolasib DC John LT Sanga pawhin thu sawiin, India ram pum huapa ruihhlo do beihpui, Nasha Mukt Bharat Campaign kalpui mek chu Kolasib district-ah pawh hawn a ni tawh tih a sawi a, "Campaign hnuaiah hian ram puma ruih theih thil hman sual tamna district 272 thlan zingah Kolasib a tel. Ruihhlo donaa hmalak hi mi tin mawhphurhna a ni," a ti.

Ruihhlo tihral pual hian Kolasib Diakkawna Synod Bookroom kawtah hun hman a ni a, ruihhlote chu Rengtekawnah tihchhiat a ni. Ruihhlo tihchhiatte chu - heroin bagha cap 358, ganja kg. 2, dawidim gram 500, beer bûr 44, sapzu ûm puitling báwm 15 leh rakzu eng emaw zat a ni.

Report-a tarlan danin, tun hnai khan Kolasib Sub-Hqrs. YMA Kumpuan Committee din thar a ni a, ruihhlo erawh kumin kum bul aṭangin an man a ni.