Kan sum dinhmun a chhiat telh telh laiin CM sum dinhmun a ṭha telh telhin ka ring - MPCC Treasurer
Congress party ṭhalaite chuan nimin khan Aizawl Tennis Court bulah 'Mipui thlavâng hauhna inkhawm' an buatsaih a; thu sawitu Zodintluanga Ralte, Mizoram Pradesh Congress Committee (MPCC) treasurer chuan, Mizoram sum dinhmun a chhiat telh telh laiin, Chief Minister sum dinhmun a ṭha telh telha a rin thu a sawi.
MLA Zodintluanga Ralte chuan, "Kan sum dinhmun ngaihtuah lék loa kan CM thil tih rah kan tuar mek a, kan ram sum dinhmun a chhe tulh tulh a, kan CM sum dinhmun erawh a ṭha telh telhin ka ring. Tunah chuan mirethei zawkte'n man chawia an inziah luh vena health care aṭang pawhin bill an la hlei thei ta lo," a ti.
MPCC Treasurer chuan, CM Zoramthanga'n inthlan hma leh hnuah sorkar laipuia sum a tamzia leh an hai chhuah nasat tur thu a sawite chu mipuiin an la hre veka a rin thu sawiin, "Nem muka liam zawih zawih, khawh luta khawh chhuak leh zur zur, a dang pawh a tam mai. Tunah eng dinhmun nge kan thlen tak?" a ti a, Finance Commissioner-in Mizoram sum dinhmun a ṭhat loh thu a puan tâk hial thu a sawi.
Sum tamzia uar taka sawi ṭhin khan a tum (dream) anga thil a thlen loh avang leh sum a enkawl thiam loh avangin Covid-19 vanga sum harsat thu a sawi reng ta mai tih sawiin Zodintluanga chuan, "State hausa zawkte chu sawi lo ila, hmarchhak state dang, keini aia Covid tuar nasa zawkte chuan hmasawnna kawng an zawh mup mup. An CM-te'n Covid vanga an sum dinhmun chhiat thu an aupui an aupui ve lo a ni," a ti.
Zodintluanga Ralte chuan, CM-in Covid vanga sum dinhmun chhiat thu a sawi reng laiin airport cute ber siamna atan cheng vbc. 70 chuang a theh chhuak tih sawiin, "Cheng nuai 100 tél man mau/ raw ṭiak a leitir lawi si. Airport chei ṭhat hna thawh a tlawh tluk tluk a, Lengte leh Bairabi lama raw chi hardenning na tlawh a ngai pawimawh hle," a ti a, CM unaupa leh Kamrul-a ten cheng vaibelchhe tél man hna an thawh reng thu a sawi.
MPCC Treasurer chuan, Mizoram ang thawh chhuah nei tlemah chuan state hausa tak nih a har tih sawiin, "Mahse, duhàmna tel loa ram hmangaihtute'n thiam taka sum an enkawl chuan rethei lutuk loin a awm theih tih Pu Lalsawta'n a lo lantir tawh," a ti.
Mipui thlavâng hauhna inkhawmah hian MPCC general secretary John Siamkunga, secretary Rosiamngheta leh MPYCC president Dr Lalmalsawma Nghaka te pawhin thu an sawi a, resolution an pass bawk.
MPYCC RESOLUTION ṬHENKHAT
1) Mizoram sorkarin damlo Health Care bill a la bat hi July 20, 2022 hmaa pe vek tura kan phûtnaah hmalak zuina a awm loh avangin, damlote bill pek chhuah a nih theihna turin hma kan la zel dawn.
2) Grape wine tam tâwk tak an mansak Lalhriatpuii (L) chhungte hnenah July 13, 2022 chhun dar 12 hma ngeia Mizoram sorkarin zangnadawmna cheng nuai 100 pe tura MPYCC-in kan phûtnaah hmalak a la ni lo leh grape wine zawrh lai an mansak pek lêt a la nih loh avangin a ṭul angin hma kan la zel dawn.
3) Champhai leh a chhehvel khuaa grape chíngtute harsatna su kianga an chungthu rêl fel vat tur leh MLP Act, 2019 leh MLP Rules a pawm danah thutlukna chiang taka puangzar vat turin kan phût.
4) July 17, 2022-a sorkarin National Health Mission (NHM) hnuaia thawkte thil phûtah hmalak nghal a nih tur thu an sawi hi chhuanlam dang siam loa rang taka tihhlawhtlin ni rawh se.