Kawng sira thil zuarte chawimawi an ni

Aizawl Municipal Corporation (AMC) bultumin nimin khan Vanapa Hall-ah kawng síra thil zuarte chawimawina hun 'SVANidhi Mahotsav - A celebration of Atma­Nirbhar Street Vendors' neih a ni a, deputy chief minister Tawnluia'n a hmanpui.

Dy Chief Minister chuan, Covid-19 léngin ram pum a tihmangan laia prime minister Narendra Modi-a’n street vendor-te dinhmun hriatpui a, an harsatna laka chhanchhuahna tur scheme a duang chhuak chu ropui a tih thu a sawi a, "Street vendor 3,500 vel sorkarah registration ti an awm a, an zinga 600 velin he scheme hi an chhawr ṭangkai a ni," a ti a, scheme chu chhawr ṭangkai turin kawng sira inzuarte a sáwm.

Street vendor-te chu an inzawrhna hmun leh an ṭhutnate tihfai kawngah theihtawp chhuah tura chahin Tawnluia chuan, "In thil zawrhte fai leh thianghlim takin vawng ang che u. Lirthei khalhtute leh kawnga kal ṭhin mipui pawh street vendor-te dimdawi ṭhin a pawimawh. A bik takin lirthei khalhtute chu street vendorte tana hlauhawm tura an hnaiha chak tak taka lirthei khalh loh a ṭha," a ti.

Dy. CM hian sorkar laipui scheme hnuaia street vendor-te hnena loan pe chhuaktu bank/financial institution leh scheme hlawhtling taka kalpuitu AMC chungah a lawm thu a sawi.

PM-SVANidhi Scheme hi Covid-19 hripuiin India ram a nuai nat vanglaia street vendor-te'n harsatna an tawhna laka khai chhuahna tura ruahman a ni a, June 1, 2020 khan Prime Minister-in a tlangzarh.

Scheme hnuaiah hian street vendor-te'n a vawi khat nan loan Rs 10,000 an dil thei a, an rulh ṭhat chuan a thawh hnihnaah Rs 20,000 an dil leh thei a, an rulh ṭhat zel chuan a thawh thumnaah Rs 50,000 an dil leh thei bawk.