Covid-19 vei mi 267 zinga mi 161-in an vei tawh lo

Nimina SRH aṭanga chhuahtir hi state páwn aṭanga rawn haw ni lo, Covid-19 positive contact aṭanga hripui kái a ni a, July 15, Nilaini khan hripui a vei tawh lo tih finfiah niin, nimin khan chhuahtir nghal a ni. Amah bakah, a pasal leh a fanu pawhin hripui an kai a, anni erawh chu a hmain an lo chhuak tawh thung.

Tun thlengin Mizorama district zingah Hnahthial district aṭangin Covid-19 vei hmuh a la ni lo a; Kolasib, Mamit, Saitual leh Khawzawl district-ahte vei an awm tawh lo bawk. Kolasib-a hripui vei tawh lo finfiah tawh pakhat erawh chu chhuahtir a la ni lo. Hripui vei hmuh chhuah tamna ber Aizawl district-ah chuan mi 116 hmuh chhuah a ni tawh a, chu'ng zinga mi 39 chu dam tawhin, mi 77-in an la vei mek a ni.

Sorkar thuchhuah hrang hrang aṭanga a lan danin, Mizorama Covid-19 vei mek mi 106 zinga mi 83 chu sipai mi leh sa an ni a, vei mek aṭangin 78.30% an tling. Hripui vei mek sipaite chu - Assam Rifles 33, NDRF mi leh sa 27, BSF mi leh sa 23 an ni.