Kan sum leh pai dinhmun dik tak mipuiin hria se kan duh - Lalsawta
Mizoram Pradesh Congress Committee (MPCC)-in nimina Congress Bhavan-a inkhawm an buatsaihah MPCC president Lalsawta chuan, Congress party chuan Mizoram sum leh pai dinhmun dik tak mipuiin hria se an duh thu a sawi.
MPCC President chuan, health care, pension, GP fund leh contract bill rei tak a hmu turte'n an hmuh theih loh thu sawiin, "Mizoram sorkar hian sum dinhmun hi mipui hriatah puang se kan tih vangin White Paper kan ngiat a ni. Ram sum leh pai dinhmun dik tak hi mipuiin hria se kan duh," a ti.
Lalsawta chuan, Assembly session zawhna chhanna aṭanga an hriat danin, MNF sorkarin Reserved Bank of India páwn aṭangin January 2022 thleng khan cheng nuai 3,26,465 leibá a pûk belh tawh thu leh leiba a tam avangin mipui phur a rih belh zel thu a sawi.
MNF sorkar tirh aṭangin leiba cheng nuai tam takin a pung nghal nia sawiin Lalsawta chuan, "Hmasawnna lian tham leh sum hmuh lêtna (infrastructure Investment) hmuh tur awm si loin, duhsak zawngte vûr nan sum an hmang chiam nia kan hriat vangin White Paper tichhuak ngei se kan duh," a ti.
MPCC President chuan, sorkar laipuiin July 20, 2022-ah CSS sum zawng zawng department account-a dah tura a tih avangin sum harsa tur angin Mizoram sorkar a insawi tih a sawi a, "CSS sumte hi a hman lohna tur, revenue expenditure-ah an lo hmang tam tih a hriat theih," a ti a; kalphung pangngaia kal tur a nih avanga sum leh paia harsatna a zualkai chhan tur mipui hriata sawifiah turin sorkar a phût a ni.