Lungleiah 'Ram leh hnam humhalh' sawiho

YMA Sub-Head­quarters, Lunglei Kumpuan Committee huaihawtin nimin khan Lunglei Sub-Hqrs YMA Conference Hall-ah YMA hruaitute leh Lunglei khawpui chhunga koh­hran hrang hrang aiawh­te'n YMA kumpuan 'Ram leh hnam humhalh' chung chang an sawiho.

Sawihona hi Sub-Hqrs YMA vice president K Lalfakzuala'n a kaihruai a, Kumpuan Committee secretary C Lalrindika'n kumpuan puala hmalak tawh dante a sawi. Kohhran hrang hrang puipate leh YMA hruaitute an tel a; ‘Ram leh hnam humhalh’ bawhzuinaah an ṭanho theih dan turte an sawiho a ni.

YMA Sub-Hqrs. Lunglei president Lalrotluanga chuan, YMA kumpuan 'Ram leh hnam humhalh' chu a hlawhtlin theih nan kohhrante nen ṭan lâkho a ṭul thu sawiin, "YMA hian ram leh hnam humhalh turin mawi tak, pawm nuam leh mi rilru hneh thei tura ke pên zel a tum. A ṭul huna tharum hman tur nei mah se, inzirtirna leh inkaihhruaina ṭha hmanga ram leh hnam humhalh a tum tlat a ni," a ti a; kohhran rawngbawlnaah pawh ram leh hnam humhalhna tura an ṭan tlân theihna a awm an beisei thu leh thawhhona ṭha an neih a beisei thu a sawi.

Inkawmhonaah hian ram leilung fate dikna leh chanvo humhalh kawnga ṭan lâk a ṭulna te, tribal ni lote sponsor leh an sumdawnna chungchang te, ruihhlo do dan tur leh ruihhlo vanga harsatna tâwkte chhan chhuahna tura ṭan lâkho dan tur te, environment humhalhna tura hmalakho dan tur te, hlemhlêtna hrang hrang do tura ke pên tlân theih dan tur te, politics ṭha lo vanga mipui rilru leh ngaihtuahna chhe tate chu veiawm an tih thu te, aia upa zah leh rinawmnate chhawm nun a ṭul dante an sawiho a ni.

An sawihonaahte chuan YMA zâwnah leh kohhran zâwna hmalak dan tur leh kalpui zel dan turah ruahmanna fel zawk leh changtlung zawk siam a, inráwn tláng chung zela ram leh hnam humhalh a hlawhtlin theih nan hmalak zel an rél a ni.