MLA leh CADC MDC-te Eirûk thubuaiah thiam loh chantir

Sorkar sum eirûk thu­buaiah CADC-a chief executive member (CEM) hlui leh Mizoram MLA ni lai Dr Buddha Dhan Chakma leh CADC CEM ni lai Buddha Lila Chakma bakah, MADC-a MDC ni lai ṭhenkhatte chu nimin khan thiam loh chantir an ni.

Kum 2013-2014 vela Chakma Autonomous District Council (CADC) hnuaia development fund cheng nuai 137 chuang tihchingpen thubuaiah nimin khan Aizawl District Court-a Special Judge (Prevention of Corruption Act) Vanlalenmawia chuan thutlukna a puang a, mi 13-te chu thiam loh a chantir a ni. Hrem dan tur erawh chu July 25, 2022-ah puan a ni ang.

PC Act Court-in thiam loh a chantirte chu tuna BJP MLA ni mek Dr BD Chakma, CADC sorkara CEM ni mek Buddha Lila Chakma te bakah, MDC-a executive member ni mek pahnih, MDC ni mek pahnih leh MDC hlui pasarihte an ni.