KHAWTHLIR
Thisen pe
PYD, Bualpui NG Bial chuan nimin khan Bualpui NG-ah thisen pek huaihawtin, Siaha District Hospital tan thisen unit 15 an pe a, petute mipa 14 leh hmeichhia pakhat an ni.
Minister-in hawng
Information Communication Technology (ICT) minister Robert Romawia Royte chuan nimin khan NIELIT, Zuangtuiah zirtirtute tana naupang zirtir kawnga information technology hman ṭangkai chungchang inzirtirna ‘Capacity Building of School Teachers on IECT Technologies’ khârna a hmanpui a, M.Sc. (Electronics) a hawng bawk.
Lirthei leh khawl pe
Mizoram Rural Bank, Lawngtlai Branch chuan nimin khan CSR kaltlangin LADC hnenah bawlhhlawh paihna atana hman tur truck mounted suction machine leh model village atana an thlan Paithar khua hnenah Bolero Pik-Up an pe.
Police-in Meth man
Mizoram Police-a Special Narcotics (CID) chuan July 21, Ningani khan methamphetamine gram 293.31 leh a neitua puh Lalramluahi Fanai (37) d/o F Lalbiaknunga, Champhai Jail Veng an man. Meth an man hi international market-ah Rs 58,00,000 hû a ni.
Inràwnkhawmna
Aizawl Sustainable Urban Transport Project (ASUTP) atana hmalakna kal mekah nimin khan Aijal Club-ah department hrang hrang hotute inràwnkhawmna, Stakeholders’ Consultation Meeting neih a ni. ASUTP project director Lalmalsawma Pachuau chuan, project tluang taka a kal chuan Aizawl khawpuia lirthei leh mipui chêtvelnaah awlsamna a thlen tur thu a sawi. Inràwnkhawmnaah hian ASUTP consultant rawih mek Mott Macdonald leh individual consultant-te'n an hmalaknate an sawi a ni.
Food training zo
Health Services hnuaia Food & Drug Administration leh Confederation of Indian Industry (CII)-te'n July 18, 2022 aṭanga Aizawla FSSAI license/registration nei thingpui dawr/restaurant/catering neite tana Aizawla 'Basic Food Safety Training & Certification (FoSTaC) Training' an buatsaih chu nimin khan zawh a ni. Training-ah hian mi 250 chuang an tel.