Sumdawng pawlte'n Minimum wages barh luih duh lo

Sumdawng pawl intél khawm, Mizoram Merchant Association (MIMA) Executive Commi­ttee nimina an pisaa ṭhukhawm chuan minimum wages barh luih an duh loh thu an tarlang.

MIMA chuan thu­chhuah siamin, "Shops and Establishments Act hmanga minimum wages anga sorkara MR hlawh ang maia Mizorama dawrkaite hman tura proposal, Cabinet meeting-a thehluh tum chungchang sawiho a ni. He mi chungchang sawihona July 4, 2022-a State Level Committee meeting-ah MIMA aiawh mi pa pali telin, kan pawm loh thu sawi chhuah a ni," an ti.

Minimum wages anga hlawh bithliahsaka sumdawngte mi chhawrte hlawh siamsak chu proprietorship-ah India ramah hmanna a awm lo nia sawiin MIMA chuan, "Industry lian, private hospital, insurance, factory, etc. lianahte chauh hman a ni," an ti a; minimum wages sumdawngte barh luih tum chu an hriatthiam theih loh thu leh an duh loh thu an tarlang.

MIMA chuan, mini­mum wages chungchang chu Chief Minister bakah, a theih ang anga thlen tum a nih thu tarlangin, "Cabinet meeting pawhin Covid avanga sumdawngte tawrh dan leh harsatna mai bakah, state harsa ber kan nihna ngaihtuaha pass lo turin kan ngen a ni. Kan ngenna a hlawhtling lo a nih chuan hmalak zel dan tur ngaihtuah leh a ni ang," an ti.