Mizoram páwna hna thawh tumte Fimkhur turin police-in an chah

Mizoram Police chuan July 21, Ningani khan thuchhuah siamin, Mizoram páwna hna thawh tumte chu fimkhur turin an chah a, lehkha ṭul angte tifel hmasa loa ram danga zin/hnathawh chu dan kalh a nih thu an tarlang.

Mizoram Police chuan, agency ṭhenkhatte'n ram danga hlawh ṭha tak neia zin/ hna thawk turin mi an thlêm ṭhin tih tarlangin, "Hna an thawhna tur an thlenin agency ṭhenkhat chuan an passport leh an lehkha pawimawhte lo hrènsakin, an duh danin hna an thawh luihtir a, chutianga hna an thawh ṭhat duh loh a, an rama kîr leh an duh pawhin pawisa tam tak chawi turin an ti a, pawisa pek tur an neih loh chuan an rama haw an phalsak lo a ni," an ti.

Police thuchhuah chuan, lehkha ṭul angte tifel hmasa loa ram danga zin/hna thawh chu dan kalh a nih thu te, mahni rama inthawn kir leh chungchangah harsatna nasa tak a thlen ṭhin thu te, mahni ram an thlen leh pawhin thuneitute'n dan tlawhchhanin thubuai an ziah luh theih thute a tarlang.

Bumna hmanga hna thawh tur kawhhmuhtute avangin mihring hralhna a thleng thei tih hriaa mi thang kama âwk lo tur leh fimkhur turin Mizo mipui an chah a; ram danga hna zawng leh thawk turte chu dan ang thlapa engkim tifel a, lehkha pawimawh zawng zawng nei tur leh agency emaw, mi dang pui ṭhintu mimal emawte chanchin hre chiang hmasa turin an chah bawk.