July thlaah hripui vei mi 2,305 hmu tawh

July 21, Ningani khan Mizoramah swab sample endik mi 701 aṭangin Covid-19 vei mi 207 hmuh chhuah a ni a, July thla chhungin mi 2,305 hmuh a ni tawh. Nimin khan hripui vei dam tawh mi 153 chhuahtir an ni a, Covid-19 vangin mi pakhat a thi.

Ningania hripui vei hmuh tharte chu mipa 95 leh hmei­chhia 112 an ni a, TrueNAT hmanga hmuh chhuah mi pahnih leh Rapid Antigen Test hmanga hmuh mi 205 a ni. Positivity rate 29.53% a ni a, a záwnin ni ruk chhung 20% chung lam a ni tawh.

Covid-19 vei enkawl lai SR Lalrinliana (65), Tuikhuahtlang, Aizawl chu nimin zing dar 8 khan State Referral Hospital-ah a thi. Amah hi natna dang nei sa a ni a, Covid-19 positive a ni tih July 15, 2022 khan hmuh chhuah niin, SRH-ah enkawl nghal a nih thu sorkar thuchhuakin a tarlang.

IDSP record angin, Mizoramah Covid-19 vei 2,31,510 hmuh chhuah a ni tawh a, mipa 1,07,733 leh hmeichhia 1,23,678 an ni a, mipa aiin hmeichhia 15,945-in an tam zawk. Nimin tlai dar 5 thleng khan mi 2,29,941 (99.36%) chhuahtir an ni tawh a, mi 708 (0.31%) thi tawhin, enkawl mek mi 762 (0.33%) an awm.

Kum 2011 chhiarpui angin, Covid-19 vei hmuh tawh 2,31,510 chu state mipui zat aṭangin 21.10% a tling a; mi 1,000 zelah positive 211 an awm tawh ang a ni a, hripui vangin mi 1,00,000 zelah mi 64 an thi tawh ang a ni.

Nimin tlai dinhmun angin, Mizorama district 11 zingah Covid-19 positive awm lohna district a awm tawh lo a, active case tamna ber Aizawl district-ah mi 356 an awm a, Lunglei district-ah mi 138 an awm bawk.