Mizoram sorkarin mau/raw ṭiak Cheng nuai 450.14 man a lei tawh
Mizoram sorkar chuan Horticulture department kaltlangin mau/raw ṭiak cheng nuai 450.14 man a lei tawh a, khaw hrang hrangah mau/ raw ṭiak 7,16,725 sem a ni tawh.
Vanglaini-in RTI Act hmanga a zawhna Horticulture department SPIO-in a chhan danin, mau/raw ṭiak supply hmasa ber atan June 3, 2020 khan Dendrocalamus Brandisii leh Dendrocalamus Latiflorus ṭiak supply-tu tur zawnna tender chhuah a ni. Tender hi Mizoram Bamboo Producer neitu F Lalhriatpuii, Ramhlun South chiahin a chháng a, ṭiak khat Rs 90-a supply turin a chháng.
F Lalhriatpuii chu tender chhángtu awm chhun a nih angin supply tir a ni a, ṭiak pakhat Rs 90-in chhang mahse Rs 80-in ṭiak 84,000 supply tir a ni a, Rs 67,20,000 man a ni. F Lalhriatpuii hian Lengte ramah nursery a nei.
A vawi hnihna atan May 7, 2021 khan Dendrocalamus Sikkimensis (raw-mi) supply-tu tur thlanna tender chhuah leh a ni a, firm paliin an chháng. Firm pali aṭangin raw-mi ṭiak supply turin firm pathum thlan a ni a, ṭiak khat Rs 85-a supply turin chháng hlawm mah se, ṭiak khat Rs 70-in supply tir an ni.
Dendrocalamus sikkimensis supply tur hian Lengte rama IMCS nursery neitu F Vanlalpeka, Khatla, Mizoram Bamboo Producer neitu F Lalhriatpuii, Ramhlun South leh Bairabi Zophaia nursery nei Bairabi Bamboo Producer neitu J Lalmalsawma, Maubawk, Aizawlte thlan a ni. An pathum hian sorkarah rawmi ṭiak 1,22,900 pektir an ni a, Rs 86,03,000 man a ni.
Tender ṭum thumna chu April 22, 2022 khan chhuah a ni a, Dendrocalamus brandisii, Dendrocalamus sikkimensis (rawmi) leh Dendrocalamus longsipathus (raw-nàl) petu tur zawn a ni.
Tender chu firm paliin an chháng a; Dendrocalamus Brandisii chu ṭiak khat Rs 100-a supply turin an chháng a, Dendrocalamus sikkimensis leh Dendrocalamus longsipathus te chu ṭiak khat Rs 90-a supply turin an chháng thung.
A ṭum thumnaah hian mau/raw ṭiak supply turin firm palite thlan vek an ni a; chu'ng zinga firm pathum chu tender chhuah ṭum hnihnaa supply-tu F Vanlalpeka, F Lalhriatpuii leh J Lalmalsawma te an ni. Anni bakah hian RKS Nursery neitu R Lalfakawma, Bairabi, Zophaia firm nei chu thlan tel a ni bawk.
Dendrocalamus brandisii chu Rs 100-in chhang mah se, ṭiak khat Rs 80-in supply tir an ni a, sorkarah ṭiak 1,33,350 pein, Rs 1,06,68,000 man a ni.
Rawmi (Dendrocalamus sikkimensis) leh rawnâl (Dendrocalamus longsipathus) chu Rs 90-in chhang mah se, ṭiak khat
Rs 75-a supply tir niin, rawmi ṭiak 1,69,2000 leh rawnàl ṭiak 84,450 sorkarah an pe. Rawmi ṭiak 1,69,200 chu Rs 1,26,90,000 man a ni a, rawnâl ṭiak 84,450 chu Rs 63,33,750 man a ni thung.
MAU/RAW ṬIAK SUPPLY DAN
1) A ṭum khatnaah ṭiak 84,000 supply niin, Rs 67,20,000 man a ni.
2) A ṭum hnihnaah Rs 86,03,000 man ṭiak 1,22,900 supply a ni.
3) A ṭum thumnaah ṭiak 3,87,000 supply niin, Rs 2,96,91,750 man ni.