Finance Commission-in AMC zir chiang ; Project lian zawk thawk turin AMC a rintlak tawh tih councillor-te'n an lo hrilh

Mizoram Finance Commission pahnihna chuan an chairman F Vanlalruata hoin July 22, 2022 khan Aizawl Municipal Corporation (AMC) zir chiangin an pisaah an kal chilh a; AMC hotute chuan AMC chu kum 10 chuang a ni tawh a, project lian zawk thawk turin a rintlak tawh thu an lo hrilh.

2nd Mizoram Finance Commission (MFC) hotute hi Aizawl mayor Lalrinenga Sailo, councillor-te leh hotu dangte'n an lo dawng­sawng a; AMC Conference Hall-ah inkawmhona leh AMC hmalakte sawihona hun hman a ni.

Sawihona hunah AMC councillor-te'n Aizawl khawpui tana chak zawka hnathawh theihna tur rawtna an neihte an sawi a; urban local body (ULB) kenkawh tura sorkar laipuiin scheme a duante AMC kutah dah a la nih loh thu sawiin, "AMC hi kum 10 chuang ding tawhin chak takin a ṭhang mek a, project lian zawk thawk thei turin a rintlak tawh a ni. Hei hi state sorkar pawhin min hriatpui se kan duh," an ti.

Councillor-te chuan, project hrang hrang an thawh tawhte a ṭhat tâwk thu sawiin, "Kan hna­thawhte hian project lian zawk khawih thei tura AMC rintlakzia a pho lang a ni," an ti a; thiamna lamah thawktute an rintlak thu leh project lian zawk thawhna tur sum Mizoram sorkarin a pek chhunzawm an beisei thu an sawi.

2nd MFC chairman F Vanlalruata chuan, ULB, automonous district council leh rural local body-te sum dinhmun zir chiangin, state sorkar aṭanga pawisa pek chhuah dan turah rawtna an siam tur thu leh, chu chuan Mizoram tan thil ṭha a thlen ngei a beisei thu a sawi.

AMC mayor Lalrinenga Sailo chuan, councillor-te thawhhona a ṭhat thu leh ward fund chu inzat veka an insem ṭhin thu a sawi a, "AMC-ah hian Indian Constitution 12th Scheduled-in function transfer tura a tih zingah tam tak transfer a ni tawh chungin hna thawk tak tak tur chuan AMC hi thuam chak a la ngai hle," a ti a; AMC dinhmun hre chungin rawtna ṭha tak an siam ngei a beisei thu a sawi bawk.

AMC commissioner Zothanmawia kaihhruai inkawmhonaah hian joint commissioner H Lalhmingthanga'n AMC sum leh pai dinhmun leh hnathawh hrang hrang a sawifiah a; AMC inrêlbàwlna leh an khawih mek te, sorkar laipui leh state sorkar aṭanga sum an hmuh dante leh AMC-in sum a thawh chhuah dan te, an sum neihte chu ṭha taka hman a ni a, a tam zawk chu Aizawl khawpui hmasawnna atan hman a nih ṭhin dante a sawifiah.

AMC zirchiannaah hian MFC pahnihna aṭangin chairman bakah, secretary Lalmalsawma leh deputy secretary Lalrohlua te an kal a ni.