Joint Ex-Servicemen Rally buatsaih

Assam Rifles chuan July 23, Inrinni khan Lammualah Covid-19 hripui a lèn hnua a vawi khatna atan Assam Rifles leh Indian Army sipai báng tawhte tan Joint Ex-Servicemen Rally an buatsaih a, Shillong-a Assam Rifles hmunpuia hotu ber, director general Lt.Gen. Pradeep Chandran Nair-a'n a hmanpui.

Assam Rifles hotu ber Lt. Gen. PC Nair chuan, sipai báng tawhte chu ram venhimna atana an ṭhat lai hun pum an hmang chu ropui a tih thu leh an inpekna fakawm a tih thu a sawi a, "Ram tana nunna hlântu sipaite hi ramin a theihngilh dawn lo a, an nupuite chu Veer Nari an ni. An nupui fanaute a theih angin sorkarin a chhawmdawl ṭhin," a ti a; sipai bángte leh sipai nupui, ram tana an pasalte'n an thihsante kâwmin an harsatnate a zawt a ni.

Ex-Servicemen Rally-ah hian sipai báng (ex-serviceman) mi 484 (officer pakua, JCO 38 leh rank dang 437), ram tana nunna hlântu sipai nupui pasarih leh sipai nupui an pasal sûn tawh mi 66 an tel.

Document lama fel lo leh pension chungchanga harsatna nei case 55, ex-servicemen leh an chhungte'n Rally-a an thlen zinga 39 chu tihfel nghal a ni. Medical camp leh dental camp bakah, bank hrang hrang leh Mizoram sorkara department ṭhenkhat - LESDE, Horticulture, Sainik Welfare leh AYUSH-te'n dawr an siam bawk.