CYMA-in kawng siam viltu tur Committee din

Central YMA chuan Mizorama national highway kawngpui, NHIDCL hnuaia company/ contractor hrang hrangin an siam mek en zuia viltu tur committee an din. Committee-ah hian CYMA vice president Lalhmachhuana chairman a ni a, CYMA assistant secretary Prof. Malsawmliana chu secretary a ni.

CYMA chuan, Lengpui Branch leh Lengpui Model Branch YMA-te chu Aizawl city branch-ah an telh thar a, heti hian city branch huam chhungah branch 108 a awm ta a ni. CYMA chuan, kumina YMA Rorel chu October 27, 2022-ah Thingsulthliah khelmualah neih a ni dawn a, Zawlbuk Group-in an thlen dawn thu a tarlang bawk.