Delhi-ah MZU Southern Campus bawhzui
Higher and Technical Education Board vice chairman Dr Vanlalṭanpuia, MLA chuan July 22, 2022 khan New Delhi-ah Union Education minister Darmendra Pradhan a kâwm a, Mizoram University southern campus din a nih thuai theihna tura thil pawimawhte a sawipui.
Dr Vanlalṭanpuia chuan, Mizoram chhim lam mipuite'n kum rei tawh tak aṭanga MZU southern campus din an beisei thu leh an nghahhlelh thu sawiin, "A thuphunga remtihna lehkha hmuh a ni tawh. Lehkhain a phût anga university dinna tur ram ngaihtuah tura tihna pawh state sorkarin Pukpui Mausep ramah a ngaihtuah fel tawh a ni," a ti.
Zirna ṭan lailâwkna atan Mizoram Engineering College sak zawh tawh hman tum a nih thu sawiin Vanlalṭanpuia chuan, Chief Minister ṭhahnemngaihnain a panna kawng, tui leh kawlphethate pek tuma hmalak mek a nih thu Union Minister a hrilh.
Dr Vanlalṭanpuia chuan ministry aṭangin university-te chu amaha inchâwm (self-finance) tur zawnga hriattirna MZU hotute'n an dawn thu sawiin, "State rethei Mizoram tan chuan thil theih loh leh harsa tak a ni," a ti a; MZU chu central university a nih angin, sorkar laipui sum hmanga enkawl a nih laia southern campus bik self-finance tura ngaihtuah chu thil àwm lo leh inmil lo tak a nih thu a sawi bawk.
Darmendha Pradhan chuan, an harsatnate chu a lo en zui tur thu leh chief minister Zoramthanga pawhin a biak tawh thu a sawi a; Ministry of Human Resource Development Secretary leh official-te ko nghalin, harsatnate ngun taka bawhzui turin a hrilh nghal a ni.