KHAWTHLIR

Thisen pe
July 23, Inrinni khan Zemabawk Branch YMA chuan Synod Hospital tan thisen unit 71 an pe a, petute mipa 65 leh hmeichhia paruk an ni. ṬKP, Central Bial pawhin Central Church kohhran hall-ah Civil Hospital, Aizawl tan thisen unit 40 an pe a, petute mipa 35 leh hmeichhia panga an ni.

Ṭanpuina hlân
Mizo Photographers’ Society chuan kum 10 an tlin lawm nan July 22, 2022 khan Cancer Hospital, Zemabawk Poor Fund-ah Rs 30,000 an hlân a; an member damlo, hun rei tak khumbeta awm kan nan pawisa an hlân bawk. Mizo Photographers’ Society hi December 4, 2012-ah din a ni.

Ar notê sem
Aizawl North-I bialtu MLA Vanlalhlana chuan July 23, Inrinni khan a bial chhung, Durtlang North-a Mission Foundation Movement (MFM) hmunah MFM-in ar notê leh a chaw an sem chhuah turte a dawngtu turte hnenah a sem. Ar notê 100 sem a ni a, a dawngtute chu taima leh rinawm taka thawk a, ar vulh hlawhtlinpui ngei turin Vanlalhlana chuan a chah a, "Mission Foundation Movement ho hmalakna hi a ropuiin khawtlang leh ram tana in hnathawhte hi a chhuanawmin fak in phu hle a ni," a ti.

Minister-in tlawh
Aizawl West-II bialtu MLA Lalruatkima, minister of state leh Sports minister Robert Romawia Royte te chuan July 23, Inrinni zing khan Tuikual Indoor Stadium an tlawh a, tihchangtlun dan tur an enfiah. Tuikual Indoor Stadium hi kum 1992-a sak niin, Tuikual North Local Council huam chhungah a awm a, chhâwng ruka sang niin, Mizoram State Sports Council kutah a awm mek. Basketball court, volleyball court, judo khelhna leh Mizoram Volleyball Association office a awm a ni.

Nupui nei
Vanglaini layout editor Lalrinpuia Varte leh Lalliankimi, Melthumte chu July 23, Inrinni khan Kolasib Galili Presbyterian Kohhran Hall-ah an innei. Vanglaini chuan nupa tuak tharte duhsakna a hlàn a ni.