Mamit College-ah Geography dah an duh
Mizo Zirlai Pawl (MZP) Headquarters, Mamit chuan thuchhuah siamin, Mamit district-a zirna leh zirlaite hmasawnna tur ngaihtuah turin sorkar an ngen a, Mamit College-ah Geography subject zirna hawn ni se an duh thu an tarlang.
Mamit MZP tarlan danin, Mamit College-ah hian arts subject paruk - English, Mizo, Political Science, Economics, Education leh History-te a awm a; an district chhunga khaw hrang hrang bakah, district dang aṭang pawhin zirlai eng emaw zat an awm a ni.
Mamit College-ah hian Geography subject dah tel turin hun rei tak aṭangin sorkar thuneitute hnenah an ngen tawh tih sawiin Mamit MZP chuan, "Kumin 2020-ah pawh dah a la ni lo hi pawi kan ti a, Mamit district-a zirlaite leh zirna min ngaihtuahpui loah kan ngai," an ti.
Mamit MZP chuan, Mamit Higher Secondary School-ah kum 2008 aṭangin Goegraphy zir theih a nih avangin zirlai tam takin an zir ṭhin a, chutih rualin, Mamit College-ah Geography a awm loh avangin geography-a tui zirlai tam takin an zir ngam loh phah thu an sawi a, "Mamit hi district headquarters kan nih ang pawhin Mamit College-a subject tlem lutuk hi pawi kan ti tak zet," an ti a; Mamit district-a zirlaite leh zirna an neihte ṭha leh changtlung zawk a nih theih nan hma min laksak turin sorkar thuneitute an ngen a ni.