Power Minister-in Kau Tlabung a tlawh

Power & Electricity minister R Lalzirliana chuan July 22, 2022 khan Kau Tlabung Mini Hydro Electricity Project a tlawh a, tihchangtlun theih dan tur a enfiah.

R Lalzirliana chuan, Kau Tlabung MHP chu tun thlenga tluang taka kawlphetha siam chhuak thei, power station hlu tak a nih thu a sawi a, "Electric siam chhuahna tur mini hydel project thar dang siam turin sum leh pai a hautak a, Kau Tlabung MHP hi tihlen theih a nih leh nih loh te, tun aia tui tam zawk khâwl khawm a, power tam zawk siam belh theih a nih leh nih lohte hriat a, a ṭul anga thuneitute nena hmalak zelna tlak a nih leh nih loh enfiah kan duh a ni," a ti.

Minister hian Kau-Tlabung MHP a enfiah zawhah Thénhlûm khuaa cheng mek C Lalrinawma, kum 2004 vela tuikhuah hna thawktu chu a chenna inah a kâwm bawk.

Kau-Tlabung MHP hi May 5, 2005 khan hawn a ni a, British siam khawl pahnih bunin, khawl pakhatin megawatt khat leh a chanve a pe chhuak thei a, khawl pahnihin kawlphetha megawatt thum an siam chhuak thei a ni.

Fûr tui tam vanglaia a pek chhuah theih sang ber chu megawatt 2.4 a ni a, tunlai hian mamawh zat tui a awm loh avangin megawatt 1.8 a siam chhuak mek a, ṭhál khawro laiin kilowatt 500 a siam chhuak thung.