2022 chhungin ASF kaihhnawihah Mizoramah vawk 17,365 a thi tawh

Kumin 2022 bikah nimin thleng khan Mizoramah vawk pùl hri, African Swine Fever (ASF) kaihhnawihah vawk 17,365 a thi tawh.

AH&Vety department chhinchhiah danin, kuminah Mizorama khua/veng 127-ah ASF a léng tih finfiah a ni tawh a, chu'ngah chuan ASF vangin vawk 8,804 a thi tawh. AH&Vety department hriatpuinain khua/veng 87-ah vawk 7,084 suat a ni tawh bawk a, ASF vanga vawk thi leh vawk suat chu a vaiin 15,888 a ni.

Kumin bikah Mizorama district 11 zinga 10 - Aizawl, Lunglei, Champhai, Kolasib, Serchhip, Lawngtlai, Mamit, Saitual, Khawzawl leh Hnahthial district-a khua/veng 127-ah ASF hri a léng tih finfiah a ni tawh a, vawk 8,804 a thi tawh. District 10-a ASF lênna khua/veng 127 zinga 36 chu Aizawl district-a mi a ni.

ASF infected area 127 zinga khua/veng 75-ah vawk 7,084 suat tawh a ni a, ASF lênna nia rinhlelh (suspected area) khua/veng 12-ah vawk 166 suat a ni tawh bawk a, vawk suat tawh zawng zawng chu 7,250 a ni.

ASF lênnaa puan tawhah vawk 8,804 a thi tawh a, ASF lenna nia rinhlelh khua/veng 59-ah vawk thi 1,311 a awm tawh bawk a; a vaiin vawk 10,115 a ni. Heti hian kumin 2022 chhung bika ASF kaihhnawiha vawk thi zawng zawng chu 17,365 a tling.

Infected area leh suspected area-a vawk suat tamna ber Champhai district-ah chuan khua/veng 34-ah vawk 3,989 suat a ni tawh a; Champhai district-a Farkawnah ASF vanga vawk thi leh suat tam berin, vawk 859 a thi tawh a, AH&Vety department hriatpuinain vawk 1,806 suat a ni tawh.

Hetih lai hian, kum 2021 chhunga ASF vanga vawk 12,568 suat neitu chhungkaw 2,488 hnena zangnadawmna pek tur Rs 10,48,42,200 chu sorkarin sem thuai a tum nia thu dawn a ni.