Sorkar hlawhchhamnaah ngai

ZPM Ṭhalai chuan thuchhuah siamin, centrally sponsored scheme (CSS) sum pek chhuah a nih dawn avanga Mizoram sorkar sum dinhmunin harsatna a tawh phah tur chu MNF hruai Mizoram sorkar hlawhchhamnaa an ngaih thu an tarlang.

ZPM ṭhalaite chuan, March 31, 2022 hma lama CSS sum dawn tawhte chu a hmangtu tur department account-a thun vek turin sorkar laipuiin state sorkarte a hriattir tih sawiin, "CSS sum pek chhuah a nih dawn avanga sum lama harsatna tâwk tur langsar state kan ni bik tur hi MNF sorkar hlawhchhamnaah kan ngai. Inthlan hmaa MNF hruaitute'n khurpui khawh lut zur zur, liam zur zur, phái thei loa an sawite kha sorkarna an chan hnuah chuan mumang mai a ni tih a chiang hle," an ti.

MNF sorkar chu laklawh thilah pawh revenue expenditure atan CSS sum hmang pûk tawh lo tura ngenin ZPM Ṭhalai chuan, "CSS sum pek chhuah a nih avanga sum harsatna awm ngei tura Mizoram sorkar sum enkawl lama mithiamte'n an sawi hi lungchhiatthlâk kan ti a, MNF sorkar hnuaiah Mizoram chuan Switzerland of the East ni loin, Sri Lanka of the East kan hnaih tual tual ni berin a lang," an ti a; Mizoramin a ngaihna hria sorkar, kalphung thar sorkar a mamawhzia ni tinin a lang chhuak zel tih an sawi bawk.