PWD leh YMA-in Sialhau kawng siam mek endik a ni

YMA Sub-Headquarters, Serchhip hruaitute leh PWD Serchhip Division hotute chuan July 22, 2022 khan Thentlang leh Sialhau inkar kawng, Pradhan Mantri Gram Sadak Yojana (PMGSY) hnuaia siam mek an endik.

Kawng endiktute chuan PMGSY kawng siam zawh tawhah siamṭhat (repair) ngai a awm tih an hmu a; kawng chhuat blacktop chhe tawhte chu fûr ruahtui tlak zawhah siamṭha tur leh kawng kama hnim chu August thla chawhma lamah sâm fai turin hna thawktu contractor-te an hrilh.

Sialhau kawnga Tuikum lui leh Théntlang inkar chu Aizawl mi KL Biaksailova thawh a ni a, Théntlang aṭanga Sialhau inkar chu Aizawl mi tho Biakchama thawh a ni.

Sialhau khawtlang hruaitute nen an inkawmnaah kawng siam zawh thuai aiin hna ṭha an mamawh thu te, hna thawh zo ṭha loin contractor-te'n an hawsan an hlauhthawn thute an lo hrilh.

Kawng endiknaah hian Serchhip Sub-Hqrs YMA aṭangin president Kawlṭhuama, office bearer dang pathum leh Vigilance leh Media & Documentation Committee hruaitute an kal a; PWD aṭangin executive engineer Zirsangliana, SDO H Lalnunpuia leh thawktu dangte an tel.

PWD hotute chuan, kawng siam mek chu a chhe lutuk lo nãin, ṭha taka enkawl zui a ngaia an hriat thu te, PMGSY sum la pek chhuah loh Mizoram pumah cheng vbc. 120 vel a awm avangin contractor hnathawhah duh anga thil tih zung zung a harsat thute an sawi a; contractor-te chu an hnathawh a chhe lutuk a nih chuan hna thawk zui thei loa siam theih an nih thute an sawi bawk.