A záwnin ni 8 positivity rate 20% aiin a sang

Mizoramah Covid-19 vei July 22, Zirtawpni khan mi 147 hmuh chhuah a ni a, July 23, Inrinni khan mi 120 hmuh a ni bawk. Ni riat chhung a záwnin positivity rate 20% aia sang a ni tawh. Hripui vei dam tawh nimin khan mi 39 leh Inrinni khan mi 122 chhuahtir an ni a, Covid-19 vanga thi an awm lo.

July 22-a hripui vei hmuh chhuahte chu mipa 81 leh hmeichhia 66 an ni a, Rapid Antigen Test hmanga hmuh vek niin, positivity rate 26.06% a ni.

Inrinnia Covid-19 positive hmuh tharte chu mipa 62 leh hmeichhia 58 an ni a, RAT hmanga hmuh vek niin, positivity rate 22.35% a ni. Endikna dang hmangin swab sample endik a ni lo. July thla chhungin hripui vei mi 2,572 hmuh chhuah a ni tawh.

IDSP record angin, Mizoramah Covid-19 vei 2,31,678 hmuh chhuah a ni tawh a, mipa 1,07,876 leh hmeichhia 1,23,802 an ni a, mipa aiin hmeichhia 15,926-in an tam zawk. Nimin tlai dar 5 thleng khan mi 2,30,102 (99.32%) chhuahtir an ni tawh a, mi 708 (0.31%) thi tawhin, enkawl mek mi 868 (0.37%) an awm.

Nimin tlai dinhmun angin, Mizorama district 11 zingah Covid-19 positive awm lohna district a awm tawh lo a, active case tamna ber Aizawl district-ah mi 436 an awm a, Lunglei district-ah mi 140 an awm bawk.