Lawngtlai DC-in kawng zauh a enfiah

Lawngtlai district bawrhsap Amol Srivastava chuan June 23 khan Lawngtlai leh Kawlchaw West inkara national highway kawngpui zauh hna thawh mek a hmunah a enfiah a, hmalak zel dan tur hna thawktute a sawipui.

Lawngtlai DC hi kawngpui zauh hna enkawltu National Highway Infrastructure Development Limited (NHIDCL) hotu te, hna viltu Intercontinental Consultants and Technocrats Pvt. Ltd (ICT) leh hna thawktu Power Mech Projects Ltd (PMPL) hotute'n an lo dawngsawng a; an thawh tawh chin dinhmun leh harsatna an neih te, an thawh chhunzawm dan tur ruahmannate an lo hrilhfiah.

Amol Srivastava chuan, kawng laihna leivûng paihin ram leilung, lui dung leh ramngaw a tihchhiat loh nana leivûng paihna tur hmun (spoil bank) an ruahman dan leh leivûng an paih dante a endik a; ram leilung tichhe lo thei ang ber tura ruahmanna awm sa anga leivung paih turin hna thawktute chu a hrilh.

Lawngtlai Bawrhsap chuan kawngpui zauh hna thawhnaa thawktute'n harsatna an tawhte chinfel dan tur a sawipui bawk a; chhim lam tana kawngpui pawimawh a nih angin, hna thawh dan tur hun bituk sa leh a hmélhmang ruahman sa milin, a ṭha thei ang ber leh a chak thei ang bera thawk turin contractor-te a chah a ni.