NEDP hmangin Mizoramah change thlentir kan tum - Planning Minister

Planning department chuan Mizoram Journalist Association (MJA) member-te pualin nimin khan IPR directorate auditorium-ah New Economic Development Policy (NEDP) chungchang zirhona an buatsaih. He hun hawngtu, Planning minister Lalsawta chuan, NEDP chu sum sem lam ni loin, ṭang taka hna thawktute puihna tur a nih thu sawiin, "NEDP hmang hian change thlentir kan tum," a ti.

NEDP workshop hi Planning secretary Dr C Vanlalramsanga'n a kaihruai a; minister Lalsawta chuan, Mizoramah change thlentir an tum tih sawiin, "Chumi tihlawhtling tur chuan mipui ṭawiawmna a ngai a, sorkar hnathawkte pawh nasa taka an ṭan a ngai," a ti a, sorkar hmalakna thlawp turin mipui a sáwm.

Lalsawta chuan, NEDP chu Mizoram hmasawnna tura hmalakna huam zau tak a ni tih sawiin, hriselna, zirna, industry, kawng, kawlphetha, infiamna, water supply, agriculture, horticulture, AH&Vety, Fisheries leh thil dang dangte a huam thu a sawi a, "Policy agenda pawimawh tak tak - administrative refgorm, land reform, climate change, power sector reform, skill development, public financial management leh Aizawl traffic jam chinfelna tur thlengin a huam a ni," a ti.

Planning Minister chuan, lo neih leh ran vulh hmanga sum tak zawk siama hausakna kawng zawh luhchilh chu an tum ber a ni tih sawiin, "Kan thar chhuah lo pungte hmanga company-te din a, Mizoram leh pawna hralh chhuah a, market economy-a luhpui turin ruahmanna siam a ni," a ti. Chuta tan chuan link raod, technical assistance, khawl hman ṭangkai leh kudam leh cold storage-te tam zawk siam tum a nih thu a sawi.

Planning Board vice chairman H Lian­sailova chuan, mi ṭhenkhatin Mizoram chu a hnung tawlh zawnga kal anga an sawi ṭhin chuan behchhan mumal a nei lo fo tih sawiin, Mizoram chu a ṭhang ve zel a, Gross State Domestic Product (GSDP) pawh 7-8% velin kum tin a ṭhang ṭhin tih a sawi a, "GSDP enin, kan ram enconomy hi a ṭhang reng a, ṭhanna tur erawh tam tak kan la nei," a ti.

Planning Board vice chairman chuan, Mizoram GSDP-ah sector hrang hrangte thawh zat percentage sawi a nih ṭhin dan chu a fuh tawk lo tih a sawi.

Hemi chungchangah hian Planning Secretary pawhin, GSDP-ah percentage zawngin agriculture leh a kaihhnawih thilte thawh zat sang viau lo mah se, a thawh zat tak tak chu nasa takin a pung tih a sawi bawk.

MJA president Vanlalrema Vantawl pawhin thu sawiin, Mizorama harsatna awm fo chu sorkar ruahmanna ṭha tak anga lang si, tihpuitlinna lama chak tawk lo ṭhin chu a nih thu a sawi a; NEDP pawh ruahmanna ṭha tak a nih angin, a tihpuitlinna kawngah tih tak zeta thawh a pawimawh tur thu a sawi a ni.

NEDP hnuaia hna thawh tawh dan zawhna chhangin Dr C Vanlalramsanga chuan, a kum khatna 2016-17 chhungin link road thar km. 413-a thui laih a nih tawh thu leh kawng hlui km. 117-a thui chei ṭhat a nih tawh thu a sawi a, "Rice mill din turin tender chhuah nawn leh mek a ni a, market yard hmun pali-ah siam tum mek niin, Bairabi rel chawlhhmunah cold storage sak tum mek a ni," a ti.

Agriculture (Crop Husbandry) director J Lalzamliana sawi danin, Agriculture department hnuaiah sorkarin tun thlengin link road km. 7,700 chuang laih a ni tawh a, link road zinga tam tak chu hman tlak a nih tawh loh avangin NEDP hnuaiah chei ṭhat tum a ni.

NEDP hi kum 2016-17 aṭangin kalpui ṭan a ni a, a kum khatnaah hian cheng nuai 27,700 dah a ni. Sorkar kum kal mek 2017-18 chhung atan cheng nuai 75,000 dah a ni bawk.

Mi hrang hrangin an ngaihdante an sawi bakah, zawhna leh chhanna hunte hman a ni. NEDP chungchang essay competition-a ti-ṭhate hnenah lawmman hlan a ni a, lawmman dawngtute chu - Dr Lalzahawma, NIFM; Jerry Zoremsanga, Mission Veng; C Lalengkima, Champhai; Lalhmingmawii, MZU leh R Lalfakzuala, Chaltlang te an ni.