Online chiahpuam laka fimkhur turin chah
Mizoram Police chuan thuchhuah siamin, tunlaiin social media-ah internet kaltlanga sumdawnna lam hawi (online chiahpuam), hamṭhatna tawktarha mi bum tum an hluar tih an tarlang a; fimkhur turin mipui an chah.
Police thuchhuah tarlan danin, online ponzi scheme-ahte hian sum eng emaw zat pe (deposit)-in member a nih theih a, member-te chu online task hrang hrang - website visit, movie download, youtube, games leh application download, Facebook leh Twitter ṭhenkhat like leh thil dangte tih tur an lo pe ṭhin. Chung aṭang chuan member-te'n hlawh an hmu ṭhin a, member pakhatin member thar (downline) an hmuhin hlawh (commission) an nei ve bawk ṭhin.
Internet kaltlanga social media-a sum hmuhna tura inzuar tam takte chu online ponzi scheme (internet kaltlanga chiahpuam) ni ngeia hriat a nih thu sawiin, Police thuchhuah chuan, "Online ponzi scheme-te hi chiahpuam business model nen inang khat renga hriat a ni. Member ni tawhte'n an sum hmuh a pun theih nan an downline tur member thar an zawng a; sum siamna dang mumal tak tarlan tur an nei lo a, member tharte deposit hi an chunga awmte sum hmuhna hnár bera hriat a ni," a ti.
Police tarlan danin, December 2013 khan SpeakAsia Online Limited (SAOL), Singapore company chu online chiahpuam ang chiaha hna thawkin inbumna nasa tak a thleng tawh a, investor-te'n sum tam tak an chan phah a ni.
March 2017 khan Noida Online Scam-ah Ablaze Info Solution Pvt. Ltd. din tupa chu a thil neih cheng vbc. 3,700 hû nena man a ni a, a company-a investor/ member-te'n sum tam tak an chán bawk.
Online chiahpuam chungchangah Economic Offences Wing-in hma a la tih sawiin Police thuchhuah chuan, "Sum tam tak chàn theihna a nih avangin mipuite fimkhur hle turin kan ngen a. Member ni mekte pawh harsatna lian tham (legal issue) an la hmachhawn theih avangin bànsan vat a him ber a ni," a ti.