Guwahati-a Mizo zirlai 2 thih thu-ah NGO-te'n a huhoa hmalak an rel
NGO Coordination Committee chuan, Guwahati-a Mizo zirlai pahnih thi chhungte'n zangnadawmna an hmuh ngei theih nan leh tualthihnaa mawhphurtute man an nih ngei theih nan a huhoa hmalak an rel.
NGO Coordination Committee-ah hian Central YMA, MHIP, MUP, MZP leh MSU-te an tel a; nimin khan Downtown University, Guwahati-a zirlai pahnih - C Lalhmangaihsanga leh R Lalmalsawma-te tualthihna chungchang leh thil dangte an rêl a ni.
NGO-te chuan, Mizo zirlai pahnihte chu rélin a sut hlum anga Guwahati Medical College-in post mortem report-ah an ziak lang anga thuthang awm chu mak an tih thu tarlangin, "Thil ni thei loah kan ngai a, a ṭul anga Mizorama post mortem tih ṭhat leh ngei a nih theih nan hmalak ni se," an ti.
Zirlai pahnih thihna chungchangah Assam sorkar thuneitute dàwr tur leh a ṭul anga thil awmzia chhui turin NGO Coordination Committee aiawh Guwahati-ah tirh an rel a; India President, Prime Minister leh National Commission for SC & ST-ah a ṭul anga thlen an rel bawk.
NGO Coordination Committee chuan, Citizen Amendment Bill, 2016 siam tumna awm chu ṭha an ti lo tih sawiin, "A hlawhtlin loh nan a ṭul anga hmalakho ni se," an ti a; AMC Licensing Regulation chungchangah, Mizo hnam tan a him loa an hriat avangin titawp a nih theih nan AMC-ah thlen an rel a ni.