MNF-in martar ruhro an phawrh belh

MNF party chuan Mizo hnam tana martar pathum, phûm an nihna aṭanga tun hnaia an ruhro phawrh lehte chu nimin khan Mizo Hnam Rûnah an thlenpui a, an pualin inkhawm an buatsaih.

MNF senior vice president Tawnluia chuan, "Martar-te thisena bual hnam hi hnungtawlh thiang kan ni lo," a ti.

Martarte ruang MNF-in phawrhte hi Capt. Rumliana, Tualte; L/Cpl. Lal­hmuakliana, Zemabawk leh, Lalnghilhlova, Lungmuat-te an ni a, April 9 1967-a Serṭawkzawl khua, Hortoki bula India sipaite kah hlum an ni.

An ruhro zawn leh phawrh leh hna chu Ex-Mizo National Army (MNA) leh Hortoki Branch YMA-te'n an thawk a; Luangmuala Martarte Thlànmualah an phûm leh dawn a ni.

Ruhdo hmuahna inkhawma thu sawitu Tawnluia chuan, "Zofate hian kan theih tawpin martarte duhthusam ang ngeiin ram leh hnam a dinchhuah nan i inhlan thar ang u," a ti a; martarte chu mahni aia ram leh hnam dah hmasa, ram leh hnam dinchhuahna leh zalenna atana hma hruaitu an nih thu a sawi.

MNF Sr. Vice President chuan, an party-in sorkarna an chelh lai aṭangin martarte zawn chhuah hna an thawk tih sawiin, la zawn chhuah lohte pawh zawn chhuah zel an tum thu a sawi bawk.