KHAWTHLIR

Tuitla ruang hmu
Lalawmpuia (19), Durtlang Leitan, May 25, Pathianni tlai dar 3:30 vela Tlawng lui Reiek kaia tla hlum chu ni li zawn a nih hnuah nimin khan Tlawng luia Sairang balu kâiah hmuh a ni.

BJP-in lawm
BJP Mizoram Pradesh chuan May 30, 2017 khan sorkar laipuia BJP kaihhruai NDA-in sorkarna a chelh kum thum tlin, Kolasib-a AMFU conference hall-ah an lawm a, bike rally an huaihawt bawk. He hun hi Mizoram BJP president Prof. JV Hluna leh Pawan Sharma, Central Prabhari (i/c Mizoram) ten an hmanpui a ni.

Jubilee lawm
Minor Irrigation department chuan May 30, Thawhlehni khan an pisaah an department kum 10-na, tin jubilee an lawm a, Chief Engineer thar lawmna hun an hmang nghal. Minor Irrigation department hi kum 1984 khan Agriculture department hnuaiah pêng pakhat angin a awm ṭan a, May 2007-ah indangin, department puitlingah hlan kai a ni.

Zirtirtu training
School Education bultumin Thawhlehni leh nimin khan Lawngtlai BRC Hall-ah Lawngtlai district-a Hindi zirtirtute pualin orientation training buatsaih a ni a, LADC-a Education officer F Chungmanga'n a hawng.

Leiminin hnâwl
Nimin zing dar 7 vel khan Kulikawnah leiminin Laldinpuii in, Assam type, chhungkaw pahnih luah lai a hnawl a, thi leh hliam an awm lo a, a bul hnaia cheng chhungkaw pasarih an inthiar chhuak. Thu dawn danin, Laldinpuii te kawmchhakah in rel lai a awm a, leiminin in in rel lai nêk tluin, in rel lai tlu chuan Laldinpuii in a hnâwl a ni.

Pisa khar dawn
Kolasib MZP chuan thuchhuah siamin, Kolasib District Hospital-a surgeon Dr. Zothansanga Zadeng transfer order amah thlakna awm si loa May 18 a tih chhuah sut leh phutna atan June 1 leh 2 hian Kolasib khawpui chhunga sorkar department office hrang hrangte khar an tum thu an tarlang.