World No Tobacco Day pualin hun hmang

Nimin, May 31 kha World No Tobacco Day a ni a, Mizoram hmun hrang hrangah hman niin, Aizawlah chuan IPR department bultumin an directorate conference hall-ah hman a ni.

IPR director Lalnithangi chuan, World No Tobacco Day chu mihring hriselna nasa taka khawih chhetu a ni tih hria a, nghei turin chíng dawklak tawhte a ngen rualin, a la ti ve ngai lote chu ti chhin lo turin a chah a, "Cancer leh natna khirh tak tak thlentu a nih avangin sorkar laipui pawhin zûk leh hmuam dona dan COTPA a siam a ni," a ti.

Lungleiah chuan Lunglei Civil Hospital-ah hman a ni a, DC mawhphurhna la mek-tu K Lalrohlua'n a hmanpui.

K Lalrohlua chuan, vaihloa inhnamhnawihin sum leh paia hmasawnna a tiṭhuanawp a, a hmangtute hriselna a tichhia tih sawiin, "Nu leh pate'n zuk leh hmuam an tih hian an fate nunah pawh a ṭhan hnan tlat a ni," a ti a; fate zûk leh hmuam ti lo tura duh chuan mahni'n tih loh hmasak a ngaih thu a sawi.

NTCP district consultant Dr Lalnunsiama Renthlei tarlan dan-in, kum 2016-17 chhung khan awareness campaign sikul hrang hrangah vawi 47 leh tlawmngai pawl leh kohhran ṭhalai pawlte tan vawi 16 an buatsaih.

Squad drive vawi 26 neiin, hmun hrang hrang 62 an tlawh a, meizial báwm 333 leh dan bawhchhia mi 53 an man.

World No Tobacco Day pual hian Champhaiah chuan Pinehill Adventist School-ah hun hman a ni a; NTCP district consultant Zosangzela'n thupui, 'Zuk leh hmuam - hmasawnna tiṭhuan-awptu' tih a sawi.

Serchhipah chuan DC conference hall-ah hun hman a ni a; khuallian, DC Sangchhin Chinzah chuan, "Tun hma chuan zûk leh hmuam dona lama hmalakna a tam tawk loh avangin zûk leh hmuam ti kan tam ṭhin. Thawktute'n nasa taka hma an lak chinah chuan hma kan sawn hle a ni," a ti.

Inkhawmah Dr K. Lallawm-zuala'n World No Tobacco Day thupui a sawi bawk.

Mamitah chuan Anti Tobacco Squad leh District Level Task Force ten joint drive an nei a, Mamit khawpuia dawr hrang hranga COTPA Section-7 zâwm lote an vâi a; tuibûr litre khat, sahdah pack 131, zozial báwm 184, ram dang meizial báwm 224 leh tlâwn 21 an man a ni.

Mamit DC Lalbiaksanga chuan, Mizoram chu cancer vei tamna ber state a ni chu vaihlo leh a kaihhnawih hnathawh ni ngeia a lan thu sawiin, "Zûk leh hmuam-ah kan insûm a pawimawh a ni," a ti a; vaihlo zuar ṭhinte chu dan ang thlapa zuar turin a chah.