Tuichang lei thawm ṭha turin ngen

Tuichangral Zirlai Pawl (TCZP) chuan thuchhuah siamin, Serchhip district-a Tui-chang lui chunga lei (bridge) chu a chhe tawh hle niin an tarlang a; a rang thei ang bera siam ṭha turin Mizoram sorkar an ngen.

Tuichang lei hi TCZP hruaitute chuan May 30, Thawhlehni khan a enfiah a, "Lei siam hna thawh a chak loh mai bakah, lei hlui, hman lai pawh a rawp tawh a, chhiatna duhawm lo tak thleng thei dinhmunah a ding mek niin kan hria," an ti.

TCZP tarlan danin, Tuichang lei hman mek chu kum 1983-a siam a ni a, a ban phuarkhawmtu thîrte a bun tawh avangin a rinawm tawk tawh loah an ngai a ni.

Lei thar tur dawh mek a ni a, a dawh nan cheng nuai 754.75 ruahman a ni. Lei dawh hna chu December 1, 2016-ah ṭan niin, December 1, 2018-ah dawh zo tura tih a ni a, lei dawhtu chu Sadguru Engineers & Allied Service Pvt. Ltd., Guwahati an ni.

TCZP chuan, lei thar dawh mektute hnathawh chu a muang hlea an hriat thu leh zawh hun tura ruahmanah an zo hman dawn loa an ngaih thu an sawi bawk.