NTUM-in pisa kai tur an dang

National Trade Union of Mizoram (NTUM) chuan, Advance Research Center for Bamboo and Ratan (ARCBR) office-a muster roll thawk laite an agreement a zawh hmaa bàn an nih dawn vanga lungawi lohna lantir nan nimin khan ARCBR pisa, Bethlehem Vengthlanga thawkte pisa kai tur an dang a, vawiinah dan chhunzawm an tum.

NTUM chuan thu-chhuah siamin, lungawi lohna an lantir nana pisa kai tur an danin awmzia a neih loh chuan nasa zawka hmalak zel an tum thu an tarlang a; ARCBR-a thawk outsourced worker-te bàn ṭhen tumna awm mek chu sût leh thuai turin ARCBR hotute an phût a, "Outsourced worker-te chu an senior dan indawta dah ngheh ni se, hmun dang aṭanga permanent staff dah ṭhin hi kan duh lo," an ti.

Rain Forest Research Institute (RFRI) Jorhat, Assam-a technical assistant result chhuakah thil fel lo tam tak a inzep tel nia hriat a nih avangin complaint a lut nual tih tarlangin NTUM chuan, result tihchhuah tawh chu a rang lama sût leh turin thuneitute an ngen a ni.