Pension tawh rawih nawn MZP-in dodal tum

MZP chuan thu­chhuah siamin, tun hnaiah sorkar department ṭhenkhatah officer pension tawh rawih nawn an awm chu a ṭul anga bawhzuia dodàl an tum thu an puang.

MZP chuan, sorkar hnathawk pension tawh rawih nawn chu hun hmasa lam aṭangin an lo dodal tawh ṭhin tih sawiin, "Ṭhangthar mithiam zawk leh an hnuaia mite kai sànna tur dâl thei zawng leh induhsakna vanga pension rawih nawn kan dodal zel dawn a, tuna pension rawih nawn awm pawh a ṭul angin hmalak zui kan rél a ni," an ti.

Myanmar rama India khua leh tui, Mizo 200 chuang tangkhang mekte chu a rang thei ang bera hruai haw dan tur ngaihtuah a, a ṭul dan azira sorkar laipui pawh dawr turin MZP chuan Mizoram sorkar an ngen bawk.