Champhaiah Homestay Scheme sawiho

Nimin khan Champhai DC conference hall-ah NEDP-Tourism hnuaia Rural Homestay Scheme kalpui dan tur sawiho a ni a, NLUP Implementing Board (NIB) chairman JH Roṭhuama, MLA-in a hmanpui.

JH Roṭhuama chuan, Rural Homestay Scheme hnuaia mihring thlan danah fimkhur a ṭul thu sawiin, "Dik taka thil ti tur-in official-te ka ring. Mikhual thleng thei tur chi leh hetiang lama tui mi chhung-kua thlan chhuah thiam a ṭha a, scheme hi hlawhtling ngei se kan duh a ni," a ti.

Rural Homestay Scheme hnuaiah hian Champhai chu pilot district a ni a, khaw paruk - Vangchhia, Dungtlang, Vaphai, Zokhawthar, Hnahlan leh Chawngtlai khuate thlan a ni.

Heng khua parukah hian chhungkaw thlan chhuahte'n mikhual thlenna tur pindan/in sain, mikhual an thleng thei dawn a, hotel angin thlen man a awm ang. India ram chhung leh páwn aṭangin a duh apiang heng khuaahte hian riahchilhin, an ram chhehvel fang tur leh an nunphung leh khawsak anga va khawsaa hun va hmang thei turin ruahmanna siam a ni.

June 9, 2017 hmain hmalakpui tur chhungkua thlan fel tur a ni a, September 2017-ah chuan scheme hnuaia in sak turte sa zo vekin, October thlaah training neihpui an ni ang a, November 2017-ah chuan a taka hman theih tura inpeih hman tum a ni. A huam chhung khaw bialtu BDO-te'n an enpui ang.

Meeting hi Champhai additional DC CC Lalchhuangkima'n a kaihruai a, Tourism department hotute leh scheme hmanna turin a huam BDO-te an tel a ni.