Pension scheme ngai pawimawh turin Minister-in kut hnathawktute a chah

Cooperation minister C Lalrinsanga chuan nimin khan Maubuangah Primary Agriculture Credit Cooperative Society (PACS) Ltd. a hawng a, kut hnathawktute chu Farmer's Pension Scheme (FPS) ngai pawimawha ngaihven turin a chah.

C Lalrinsanga chuan, Farmer's Pension Scheme chu kum 18-40 inkarin an hman theih a nih thu sawiin, ngai pawimawh a, common service centre (CSC) hnai bera inziak lut thar leh turin kut hnathawktute a chah a, "Kut hnathawktute'n kum 60 an kai hunah pension thla tin Rs. 3,000 an lâk theihna tur scheme ṭha a ni. Mizoram puma inziak lut mi 200 vel chauh an awm hi a pawi hle," a ti a; FPS chu Maubuang aṭanga a alh chhuah theih nan ṭan la turin mipui a sáwm.

Cooperation Minister chuan, consumer cooperative society behchhana PACS din a ni chu lawmawm a tih thu sawiin, "Maubuang hi khaw ṭangrual leh inlungrual tak an ni tih a lang. Hmasawnna ruhrel ṭan dawn chuan leilung behchhan tel loin a hlawhtling thei lo a, rinawm taka leilung behchhana thlai thar chhuah chu bul ṭanna dik niin, thlai thar chhuah aṭanga pawisa tlem lua awm lo an khawl theih nan PACS chhungah a tam thei ang ber inrín lut se," a ti.

Mizoram Cooperative Apex Bank chairman T Lalmuanpuii pawhin thu sawiin, PACS kalhmang a sawifiah a, "Kut hnathawktute tan tlem lua awm loa sum khâwlna leh dahṭhatna ṭha tak a ni a, PACS member leh account hawng pung zel se a duhawm," a ti a; mi ṭhahnemngai tan chuan din chhuahpui theihna hmanrua, loan-te pawh lâk theihna a nih thu a sawi.

Maubuang Consumer Cooperative Society hi kum 1974-ah din a ni a, kum 1994-ah retailer hna an thawk ṭan. Dawr an siamah in sakna bungrua te, ei chawp damdawi, chhungkaw mamawh bungruate zawrh a ni a, ni khatah Rs. 12,000 man vel an hralh ṭhin.