Governor-in NEC Plenary Session-ah Lengpui Airport tihchangtlun a rawt

Governor Lt. Gen. Nirbhay Sharma chuan May 29, 2017 khan New Delhi-ah 66th. NEC Plenary Session a hmanpui. May 30 khan Kolkata-ah Indian Chamber of Commerce leh Ministry of External Affairs ṭangkawp buatsaih 'Kolkata Diologue 2017' a hmanpui bawk. Larsap chuan Lengpui Airport tihchangtlun a rawt.

NEC Plenary Session-ah hian Governor chuan, Mizoram leh hmarchhak bial hmasawnna atan Lengpui Airport chu India leh Asia chhimchhak ramte nena inthlunzawmna tura hmun pawimawh berte zinga hlankai a rawt a, "Sorkar laipuiin a kalpui mek ‘Vision 2020’ hnuaiah hian hmarchhak bial tihhmasawnna turin sum vbc. 30 vel mamawh a ni," a ti.

Larsap chuan, NEC leh DoNER hnathawh dan ṭhen fel chian a ṭul thu sawiin, DoNER-in policy leh sum pek chhuah dan enkawl se, NEC-in planning leh monitoring enkawl thung se, tiin rawtna a thlen.

Kolkata Dialogue 2017 khârna inkhawmah Governor chuan, sorkar laipuiin Act East a kalpui mekah hmarchhak bial pawimawhna leh hmalakna tura a hriatte a tarlang.

Lt. Gen. Nirbhay Sharma chuan, hmarchhak bial len zawng chu ram pum aṭanga chhûtin 8% a nih laiin, a mihring cheng tam zawkte chu tribal an ni a, ram pum mihring aṭangin 4% chauh an nih thu a sawi a, "Ramin za­lenna a sual chhuah hnuah British awpna hnuaia ramri leh inkalpawhna hrang hrangte tihdanglam a nih khan nasa takin a nghawng a ni," a ti.

Hmarchhak bial ramri zinga a tam zawk, 98% chu international border a nih avangin, India leh Asia chhimchhak ramte nena in­sumdawn tawnna turah hmun laili leh pawimawh ber a nih dawn thu sawiin Governor chuan, "Hmarchhak hi nasa taka tihhmasawn chu tihmâkmawh a ni," a ti a; hmarchhak bial tih­hmasawnna kawngah ram chhunga sumdawng leh pawl lian­te'n hma la se a duh thu a sawi.