PES tiṭhate hnenah Lawmman hlan a ni

Mizoram Synod hnuaia PES Sub-Co­mmittee chuan May 31, Nilaini khan Presbyterian English School (PES) zirlai, HSLC 2017-a ti ṭhate chawimawina leh lawmpuina hun, Synod Office-ah an hmang.

Inkhawm hi Synod executive secretary i/c Education Rev. B Sangthanga'n a kai­hruai a, supervisor of schools (PES) PC Van­lalhruaia'n report a pe a, Synod moderator Rev. Lalzuithanga’n lawmmante a sem a ni.

HSLC 2017-ah khan PES zinga sikul 19 aṭangin exam beitu an awm a, sikul 10-in 100% pass record an nei a, sikul parukin 80% pass record an nei. HSLC hmachhawntu zirlai zat chu 360 an ni a, an zinga 332 pass in, pass percentage chu 92.22 a ni.

HSLC 2017-a tiṭha ber PES chu East Lungdar PES niin, computer pek an ni a, pahnihna Darlawn PES hnenah Rs. 12,000 leh pathumna Zotlang PES hnenah Rs. 10,000 hlan a ni. Distinction-a pass zirlai 40 hnenah laptop pek a ni bawk.