Zirtirtu an hna tlin ngang lote dim vak kan tum lo - Himpuia

Serchhip MZP chuan nimin khan an district-a HSLC leh HSSLC pass ṭhate chawimawina hun, DC conference hall-ah an buatsaih a; khuallian, parliamentary secretary (School Education) Joseph Lalhimpuia chuan, zirtirtu, an hna tlin ngang lote chu dim vak an tum loh thu a sawi.

Joseph Lalhimpuia chuan, sorkarin zirna lamah nasa taka hma a lak thu sawiin, "Zirna inte pawh a thuam ṭha nasa a, budget lama hlawh indaih loa awm reng ṭhin pawh kum 2014 aṭangin tihbo a ni tawh. Chuvang chuan, thawktute lakah pawh sorkar beisei a sang a, hna tlin ngang lote chu dim vak kan tum lo," a ti.

Parliamentary Secretary chuan, zirlai chawimawina dawngte chu an kal zelnaah chawimawi tlak nih tum tlat tur leh an hnunga mite tana entawn tlak nih tum turin a fuih a, "Tunlaiah tharum hi chakna a ni lo a, hriatna hi chakna hnár zawk a ni," a ti a; hre tam apiang an dinchanna khawvel a nih tawh thu a sawi.

Serchhip MZP-in chawimawina an pekte hi zirlai 29 an ni.