MZP-in Kolasib-ah sorkar pisate an dang

MZP headquarters, Kolasib chuan, Kolasib Dist rict Hospital-a surgeon Dr Zothansanga Zadeng, Serchhipa sawnna thupek (transfer order) sût tura sorkar an phûtna tihhlawhtlin a nih loh avangin nimin aṭang khan Kolasib-a sorkar pisate an dang ṭan.

Kolasib aṭanga thu dawn danin, Kolasib MZP-te hian Kolasib khawpui chhunga sorkar pisa hrang hrang an dang a; damdawi-in, zirna-in leh Police department office-te erawh an dang lo thung. Kolasib MZP hmalakna vang hian buaina a awm hriat a ni lo.

MZP-te chuan an hmalakna chu thláwp turin an district mipui an ngen bakah, sorkar hnathawkte chu kal lui lo turin an ngen a, "Kan hmalakna hi a tawp thlenga min thláwp turin kan ngen che u a ni," an ti.

Kolasib MZP tarlan danin, Dr Zothansanga Zadeng sawn chhuahna thupek hi May 18, 2017-ah tihchhuah a ni a, amah thlaktu tur dah a ni lo. Transfer order sût tura Health Minister ngen tumin May 22-ah Aizawlah an kal a, mahse, an hmu thei lo.

Congress Bhavan-ah Home minister R Lalzirliana an hmu a, "Health Secretary kan lo be ve phawt ang a, Kolasib ka lo kal hun min lo nghak rawh u," tiin min chháng. Home Minister chu May 24-ah Kolasib Circuit House-ah an hmu leh a, sorkarin doctor 26 a lak thar tur tihfel hma leh Kolasib-a doctor awm tur tihfel hma chuan Dr Zothansanga Zadeng chu sawn lo turin an ngen a ni.

MZP hian Dr Zothansanga Zadeng chu a chennaah lên chilhin, Kolasib chhuahsan lo turin an ngen a, Kolasib a chhuahsan lo nan an veng nghal bawk.