KHAWTHLIR

Delhi-ah Sawta
June 3, Inrinni hian New Delhi-a Vijay Bhavan-ah Good & Service Tax (GST) Council meeting neih a ni dawn a, meeting-a tel tur hian Taxation minister Lalsawta chuan nimin khan Delhi a pan.

DC-in tlawh
May 30, 2017-a thlipui Cyclone Mora tlehin Lawngtlai district chhung hmun hrang hrangah chhiatna a thlen a, Lawngtlai khawpui bika chhiatna thlenna hmun ṭhenkhat chu nimin khan DC Dr A Muthamma-in a tlawh a, a ṭul anga hma la tur hian block hrang hranga BDO-te a hriattir a ni.

Tuitla hmu
May 31, 2017 chhuna Khawchhak Tuipuia tla hlum, Melody Lalrohlui (7) d/o Ralkapzuala, Tuipui khua chu nimin khan Champhaia veng hrang hranga mi tlawmngaite'n an zawng a, nimin chhun dar 11:15 khan hmuh a ni.

Thisen pe
Kawnpui Chhimveng Bial KṬP chuan, nimin khan Kawnpui Dinthar Kohran Hall-ah blood donation camp an huaihawt a, mipa 25 leh hmeichhia pathum-in Synod Hospital tan thisen unit 28 an pe.

Rs. 4,24,000 sem
Mizoram Synod chuan May 2017 chhung khan Synod Relief Fund aṭangin chhawmdawlna Rs. 4,24,000 a pe chhuak. Relief Fund a pek dan chu - kângmei tuarte tan Rs. 16,000, thlipui tuarte tan Rs. 2,30,000, damlote tan Rs. 24,000, leimin tuarte tan Rs. 20,000, rial tla tuarte tan Rs. 1,24,000 leh accident tawkte tan Rs. 10,000 a ni.