Kum 18-21 inkar roll-a chuang lote tan Special Drive buatsaih a ni dawn

Election Commission of India (ECI) thupek angin, nimin aṭang khan India khua leh tui, kum 18-21 inkar electoral roll-a chuang lote tan electoral roll-a inthun rûnpui, Special Drive atan inbuatsaih ṭan a ni a, June 30, 2017 thleng a awh ang.

District hrang hranga DC-te chuan Special Drive neih tur chungchang hi thuthar thehdarhtute an hrilhfiah a; Lungleiah chuan DC mawhphurhna la mektu Lalrohlua'n a pisaah thuthar thehdarhtute kâwm.

Lalrohlua chuan, "India khua leh tui dik takte electoral roll-a an hming a awm theih nan ECI-in theihtawpin a bei a, summary revision neih ṭhin ni mah se, hmaih palh a awm loh nan kum 18-21 inkar, January 1, 2017-a kum 18 tling chinte tan Special Drive hi a ruahman a ni," a ti a; special drive chu dik taka official-te’n an tih theih nan tlawmngai pawl leh political party aiawhte ṭawiawm turin a sáwm.

Tun dinhmunah Lunglei district-ah Assembly constituency pasarih a awm a, voter 1,01,336 awmin, mipa 50,796 leh hmeichhia 50,540 an ni.

Serchhipah chuan DC Sangchhin Chinzah-in a pisaah thuthar thehdarhtute a kâwm a, "Special Drive hian khua leh tui kum 18-21 inkar, electoral roll-a hming la chuang lo zawn chhuah leh dah luh chu a tum ber a ni. Chutih rualin, siam ṭhat, insawn, polling station awmna sawnte leh inpaih ngai paih zawng zawngte pawh thawh nghal vek tur a ni," a ti.

Serchhip DC sawi danin, zawhna leh hriatthiam loh neite tan fee chawi loa phone hmanga zawhfiah theihna Serchhip district tan telephone number 03838-226012-ah biak theih reng a ni.

Lawngtlaiah chuan Special Drive neih tur chungchang hi DC Dr A Muthamma-in a pisaah thuthar thehdarhtute a hrilhfiah. Lawngtlai DC chuan, "India khua leh tui, kum 18 tling chinte chu electoral roll-a an awm ngei a ṭul a, zau taka puanzar a ṭul a ni," a ti a; thuthar thehdarhtute chu Special Drive atana thawhpuiah a sáwm.

Mamitah chuan additional DC H Lianzela'n DC conference hall-ah Special Drive neih tur chungchang a sawifiah a; drive neih chhung hian electoral roll-a inthun thar bakah, mitthi tawh paih hna thawh tel a nih tur thu a sawi.

Champhaiah chuan additional DC CC Lalchhuangkima'n DC conference hall-ah thuthar thehdarhtute a hrilhfiah a; political party, tlawmngai pawl (YMA, MHIP leh MUP), college leh higher secondary school zirtirtute leh thuthar thehdarhtute chu thawhpuiah a sâwm a ni.