BJP-in Green Mizoram Day sawn an phût

BJP, Mizoram Pradesh chuan thuchhuah siamin, Mizoram sorkarin kum-ina Green Mizoram Day atana Pathianni, June 11 an thlang chu awm lo an tih thu an tarlang a, Green Mizoram Day atan Pathianni ni lo, ni dang ruat thuai turin an phût.

Mizoram BJP chuan, kuminah June 11 chu Pathianni a ni tih sawiin, "Kristian tam zawkte tana ni pawimawh ber mai Green Mizoram Day-a a ruat hi âwm lo kan ti a, a rang thei bera sawn a, Pathianni ni lo, ni dang ruat nghal vat turin kan phût a ni," an ti. Mizoram sorkarin Pathianni a ruat chu Congress party-in Kristiante a hmuhsitzia tarlannaa an ngaih thu an sawi bawk.

Hetih lai hian, tun hnaiah Green Mizoram Day hi June 11-ah hman a ni tlangpui a; kum 2016, 2015, 2014 leh 2013-ahte June 11-ah hman a ni. Kum 2012-ah June 14-ah hman a ni a; kum 2011-ah erawh chuan district hrang hrangah hman hun a inang lo thung.