Maucharah sikul khâr a ni

Mizo Students Union (MSU) sub-headquarters, Mauchar chuan, Mauchar Primary School zirlaite chu May 30, 2017 khan tlangval pahnih zu rûiin an nghaisa nia sawiin, an dem thu an tarlang. Thil thleng vang hian sikul khâr a ni.

Mauchar MSU chuan, Mauchar P/S zirlaite thlabár leh mangang taka siamtute chu Lalhunthara s/o Thangduailova leh Khuangthanmawia s/o Thanbanglova te an ni tih sawiin, "Pawi khawihna hi kan la na hle a, an chungah hremna na tak la ngei turin sorkar thuneitute kan phût," an ti.

Mauchar MSU tarlan danin, zirlaite nghaisak duh loh lantir nan May 31, Nilaini khan Mauchar khaw chhungah zirlaite'n kawng an zawh a; zirlaite chu sikulah an kal ngam loh avangin Nilaini aṭang vêk khan sikul khâr a ni. MSU chuan, thuneitute hmel hmuh a nih hma chuan Mauchara sorkar sikul zawng zawng khâr a nih tur thu an sawi.